तातोखबर, काठमाडौँ / नेपाल मजदुर किसान पार्टीका सांसद प्रेम सुवालले सत्तारुढ गठबन्धनको न्यूनतम नीतिगत प्राथमिकता र साझा संकल्प नामको न्यूनतम साझा कार्यक्रमलाई कागजको खोस्टामात्र भएको बताएका छन् ।

बुधवार प्रतिनिधिसभा बैठकमा आगामी आर्थिक वर्षको बजेटको सिद्धान्त र प्राथमिकतामाथिको छलफलमा भाग लिँदै सांसद सुवालले सत्ता गठबन्धनको न्यूनतम साझा कार्यक्रम कागजको खोस्टामात्र भएको बताउका हुन्।

Advertisement:

मंगलवार (हिजो) सत्तारुढ पाँच दलीय गठबन्धनले सरकार संचालनका लागि सार्वजनिक गरेको सो कार्यक्रममा सरकारी जग्गा व्यक्तिको नाममा गएको खारेज गर्ने, कोशी, गण्डक, महाकाली, माथिल्लो कर्णालीलगायत देशघाती सम्झौता खारेज गर्ने उल्लेख नभएको जिकिर गर्दै त्यसको कुनै अर्थ नभएको बताए।

गरिवी हटाउने योजना बनाउँदा चीनबाट सिकेर योजना बनाउन पनि उनले सरकारलाई सुझाव दिए। उनले प्रांगारिक खेतीबारे क्युबाबाट जानकारी लिन पनि सरकारको ध्यानाकर्षण गराए।

उनले सभामुख देवराज घिमिरेलाई सांसदहरुको अभिभावकीय भूमिका निर्वाह गर्न पनि आग्रह गरेका छन् ।

‘सरकारी जग्गा व्यक्तिको नाममा गएको खारेज गर्ने, कोशी, गण्डक, महाकाली, माथिल्लो कर्णालीलगायत देशघाती सम्झौता खारेज गर्ने उल्लेख नभएका हुँदा यो साझा कार्यक्रम कागजको खोस्टाजस्तै हो‚’ सांसद सुवालले भने, ‘प्रांगारिक खेतीबारे क्युबाबाट सिक्न सकिन्छ। गरिवी हटाउन मित्र देश चीनको नमूना उपयुक्त हुने सुझाव यहाँ दिन चाहन्छु। सभामुखले सांसदहरुको अभिभावकीय भूमिका निर्वाह गर्न जरुरी छ।’

• #नेपाल मजदुर किसान पार्टी
• #न्यूनतम साझा कार्यक्रम
• #प्रेम सुवाल
• #सांसद