गजल

पालुवासँगै चराचुरुङ्गी मुस्कुराए जस्तो छ

लाग्दैछ, बल्ल पो बसन्त आए जस्तो छ

अँध्यारो अँध्यारो देख्दैछु मलिन मुहार

ऊ सँग उसकी सङ्गिनी रिसाए जस्तो छ

नजरले देखे हातले चुँढे उसको अस्तित्व

अत्तर छाड्नु अघि फूल ओइलाए जस्तो छ

हिजो मात्रै सेयर बजार छिरेको हो ऊ

ठूलै भाग खाने सपनाले डुबाए जस्तो छ

मसाल उठाएर जुलुसमा के हिडेको थियो

सोच्दो हो हत्केलामा सुर्य उठाए जस्तो छ

लिने हातले आज दान दिएको हेरेर आएँ

आज त घाम पश्चिमबाट उदाए जस्तो छ

कोइलीको सङ्गत परेर होकी क्या हो कुन्नि

काग पनि मधुर स्वरमा गुन्गुनाए जस्तो छ

यहाँ नबोलेरै चल्ने रहेछ प्रेमको दाउपेच

आँखाले आँखालाई केही बताए जस्तो छ