काठमाडौँ / प्रतिनिधिसभा सदस्य प्रभु साहले सांकेतिक विरोध प्रदर्शनमा उत्रिएका कवाडी व्यवसायीमाथि प्रहरीको लाठी चार्जबारे उपप्रधानमन्त्री एवं गृहमन्त्री रवि लामिछानेसँग जवाफ मागेका छन् ।

बुधवारको प्रतिनिधिसभा बैठकमा बोल्दै उनले सांकेतिक प्रदर्शनका क्रममा कवाडी व्यवसायीमाथि भएको प्रहारबारे सरकारको जवाफ माग गरेका छन् । उनले सांकेतिक विरोध प्रदर्शन गर्ने नेपाली जनताको संवैधानिक हक भएको उल्लेख गरे ।

Advertisement:

उनले प्रहरीको लाठी चार्जका कारण मंगलवार बानेश्वरमा आन्दोलनका क्रममा ५० जना घाइते भएको र एक दर्जनभन्दा बढी गम्भीर घाइते भएको बताए ।

साहले भने, ‘सांकेतिक विरोध प्रदर्शन गर्ने नेपाली जनताको संवैधानिक हक हो । लोकतान्त्रिक हक हो तर हिजो कवाड व्यवसायीहरू सांकेतिक जुलुसमा थिए । सांकेतिक आन्दोलनमाथि प्रहरीले निर्मम प्रहार गरेको छ। ५० जना जति घाइते छन् । एक दर्जन जति त गम्भीर घाइते भएका छन् । म गृहमन्त्रीको भनाइ चाहन्छु, सांकेतिक जुलुसमा किन लाठी प्रहार भयो ?’

प्रतिनिधिसभा सदस्य अमरेशकुमार सिंहले कवाडी व्यवसायीमाथि सरकारले दमन गरेको बताए । उनले मधेशी जनतामाथि प्रहरीले दमन गर्नुले फेरि रंगभेदको आन्दोलन शुरु हुने खतरा देखिएको बताए । उनले आन्दोलनका क्रममा प्रहरीको लाठी चार्जबाट घाइते भएकाहरूको निःशुल्क उपचारको माग गरे ।

• #कवाडी व्यवसायी
• #गृहमन्त्री रवि लामिछाने
• #प्रतिनिधिसभा
• #प्रतिनिधिसभा बैठक
• #प्रभु साह
• #मधेशी
• #लाठी चार्ज
• #विरोध प्रदर्शन