काठमाडौँ / नेकपा (एकीकृत समाजवादी)ले दलको दसौँ महाधिवेशनबारे विभिन्न देशका कम्युनिस्ट-सोसलिस्ट-लेबर पार्टीलगायतका करिब छ सय पार्टी निकट दल र त्यसका सङ्गठनलाई जानकारी गराएको छ ।

पार्टी विदेश विभागको आज बजेको नवौँ बैठकमा बङ्गलादेश, इरान, कजाकस्तान रुस, फ्रान्स, रोमानिया, अस्ट्रेलिया आदि गरी २२ देशबाट प्रारम्भिक प्रतिक्रिया प्राप्त भइसकेको विवरण दिइएकाे थियाे ।

Advertisement:

दलका सम्मानित नेता तथा पार्टी विभाग प्रमुख झलनाथ खनालका अध्यक्षतामा आज आलोकनगर कार्यालयमा बसेको बैठकमा महाधिवेशनमा विदेशका साम्यवादी दल,  वामपन्थी दल तथा  प्रगतिशील सङ्गठनहरूलाई निमन्त्रणा गरिनेबारे पनि छलफल भएको जनाइएको छ ।

बैठकमा पूर्वप्रधानमन्त्री खनालले महाधिवेशनमा समाजवादी क्रान्ति र पूर्ण रूपान्तरणको कार्यक्रमसहित चार दस्तावेज आउने र सकेसम्म केन्द्रीय समितिको एकै प्रतिवेदन बन्ने बताए।

विभागका उपप्रमुख प्रमेश हमालले माक्सवादी-लेनिनवादी सिद्धान्तअनुरूप समाजवादी क्रान्ति र रूपान्तरणका दिशामा अगाडि बढ्ने पार्टीको कार्यक्रम रहेको स्पष्ट पारे।

उपमहासचिव डा विजयकुमार पौडेलले रुसी सेनामा भर्ना भएका नेपालीलाई फिर्ता गराउने, मृत्यु भएका परिवारलाई क्षतिपूर्ति दिनेलगायत माग राखी पीडितका तर्फबाट भइरहेको अनशनमा  पार्टीको ध्यान पुग्नुपर्ने र छिट्टै सरकारसँग सहमति गराउन भूमिका खेल्नुपर्नेमा जोड दिए।

दलको अधिवेशन आगामी असार १६ देखि २० गतेसम्म नेपाल प्रज्ञा–प्रतिष्ठानमा हुने छ।​यसैबीच पार्टी स्थायी कमिटी बैठक यही वैशाख २६, पोलिटब्यूरो बैठक यही वैशाख २७ र केन्द्रीय कमिटी बैठक वैशाख २८ र २९ गते बस्दै छ।

• #नेकपा एकीकृत समाजवादी
• #पत्राचार
• #महाधिवेशन
• #माक्सवादी-लेनिनवादी