काठमाडौं /  आज सेयर बजार परिसूचक नेप्से ७० अंकले ओरालो लागेको छ । सोमबार सर्किट ब्रेक लागेर बन्द भएको सेयरबजार एक दिन पनि टिक्न सकेन ।

अघिल्लो दिन सोमबार ११७ अंकले बढेर सर्किट ब्रेक लागेको नेप्से परिसूचक मंगलबार ७०.३१ अंकले घटेर २००७.६९ बिन्दुमा रोकिएको छ । यसदिन बजारमा १ करोड १४ लाख ६७ हजार ५९९ कित्ता सेयरको खरिदबिक्री हुँदा ४ अर्ब ११ करोड ३६ लाख ७६ हजार रूपैयाँको कारोबार भएको छ ।

Advertisement:

यस दिन १२ वटा उपसूचक राताम्य भएका छन् भने एकमात्र म्युचुअल फण्ड उपसूचक ०.६६ प्रतिशतले बढेको छ । आज अन्य उपसूचक ४.३५, हाइड्रोपावर ४.३० र उत्पादन तथा प्रशोधन उपसूचक ४.२० प्रतिशतले घटेको छ ।

मंगलबारको कारोबारमा बोटल्स नेपाल बालाजु लिमिटेड नेगेटिभ सर्किटसँगै सर्वाधिक घाटामा रहेको छ । कारोबारका आधारमा सोनपुर मिनरल्स एण्ड आयल लिमिटेड ४१ करोड ९१ लाख रूपैयाँको कारोबारका साथ शीर्ष स्थानको सूचीमा देखिन सफल भयो ।

सोमबार सेयरबजारमा कारोबार खुलेको तीन मिनेटमै पहिलो सर्किट ब्रेक लागेर २० मिनेटका लागि बन्द भएको थियो । पहिलो सर्किट ब्रेकपछि खुलेको एक मिनेटमै दोस्रो सर्किट ब्रेक लागेर ४० मिनेटका लागि कारोबार बन्द भयो । भने, दोस्रो सर्किट ब्रेकपछि खुलेको बजार एक मिनेट नहुँदै पुन: सर्किट ब्रेक लगेपछि सोमबारको दिनभरको कारोबार नै बन्द भएको थियो ।

• #घट्यो नेप्से
• #नेप्से
• #नेप्से परिसूचक