तातोखबर, चितवन / चितवनको रत्ननगर नगरपालिका–१० स्थित एकता शिशु निकेतन विद्यालयमा कक्षा–८ मा अध्ययनरत शालीन पोखरेलले आत्महत्या गरिएको भनिएको घटना शंकास्पद देखिएको छ ।

१२ फागुन शनिबारको दिन बिहान सोही स्कुलको होस्टेलमा झुन्डिएको अवस्थामा भेटिएकी उनको शवको प्रकृतिको विषयलाई लिएर आफन्तले प्रश्न उठाएका हुन् ।

Advertisement:

घटनाको सत्यतथ्य छानबिन गर्न शालीनका बुबा दीपेन्द्र पोखरेलले माग गरेका छन् । दीपेन्द्रले शुक्रबार काठमाडौंमा मिडियाकर्मीहरुसँग भने, ‘‘गालामा २ वटा घाउ छ । यौनाङ्गमा चोट लागेको देखिएको छ । झुन्डिएर आत्महत्या गरेको भनिएको घटनामा यो कसरी भयो ?’’

शालीनको शव त्रिवि शिक्षण अस्पताल महाराजगन्जमा रहेको छ । पोष्टमार्टमको रिपोर्ट समेत परिवारले पाएको छैन । झुन्डिएको अवस्था लास  भेटिएको, त्यहाँको वातावरण र वस्तुस्थिति हेर्दा आफ्नी छोरीले झुन्डिएर आत्महत्या गरेको भन्ने कुरा अस्वाभाविक र अपत्यारिलो देखिएको उनले बताए ।

आत्महत्या भनिएको घटनाको अनुसन्धान गरी दोषीलाई कारबाही गर्न माग गरेका छन् । ‘‘म त्यहाँ पुग्नुभन्दा पहिले नै घटना भएको छात्रावासको ढोका फोडिएको थियो, घटना भएको ठाउँमा सरसफाइ गरिसकेको थियो । शालीनले लगाएको कपडा, जुत्ता पानीमा डुबाइएको अवस्थामा फेला परेको थियो । प्रमाण किन नष्ट गरियो ?’’ दीपेन्द्रले प्रश्न गरे ।

• #आत्महत्या
• #त्रिवि शिक्षण अस्पताल
• #पोष्टमार्टम