मन्जिता मैनाली

हेटौंडा– पछिल्लो समय गर्भपतन गराउने महिलाको संख्यामा वृद्धि हुँदै गएको छ। सरकारी अस्पतालमा पनि गर्भपतन सेवा दिइरहिएको भएता पनि निजीमा गर्भपतन गराउनेको संख्या निकै नै बढी देखिन्छ ।

Advertisement:

हेटौंडा अस्पतालको तथ्यांक अनुसार चालू आर्थिक वर्षमा मात्र १ सय १६ जनाले गर्भपतन गराएका छन् । जसमध्ये २० वर्ष मुनिका ३ जना रहेका छन् ।
गत आर्थिक वर्षको तथ्यांकमा २ सय ७६ ले सुरक्षित गर्भपतन गराएका मध्ये ७ जना २० वर्ष मुनिका थिए । हेटौंडामा रहेको गर्भपतनका लागि सरकारी मान्यता प्राप्त पोलिक्लिनिक सुनौलो पोलिक्लिनिक प्रा.लि. मा गर्भपतन गराउने बढ्दो देखिएको छ । हेटौंडा अस्पतालमा गर्भपतन निःशुल्क भएता पनि महङ्गो शुल्क तिरेर निजीमै गर्भपतन गराउनेको संख्या तेब्बर नै बढी देखिन्छ ।

निजि पोलिक्लिनिक सुनौलो पोलिक्लिनिकको तथ्यांक अनुसार चालू आर्थिक वर्षको ६ महिनामै ३ सय ९० जनाले गर्भपतन गराएका छन् भने गत आर्थिक वर्षमा ८ सय जनाले गर्भपतन गराएका थिए। यो तथ्यांक हेर्दा निजिमा गर्भपतन गराउने संख्या सरकारी अस्पतालमा भन्दा निक्कै बढी देखिन्छ । हेटौंडा अस्पतालमा गर्भपतन निःशुल्क हुन्छ भने सुनौलो पोलिक्लिनिकमा सुरक्षित गर्भपतन सेवा प्याकेज भनेर ४ हजार लाग्छ भने सुरक्षित गर्भपतन सेवा औषधि सेवनबाट २ हजार लाग्ने गर्छ । हेटौंडा अस्पतालमा निशुल्क गर्भपतन हुने भएतापनि निजीमै महँगो शुल्क तिरेर महिलाहरु गर्भपतन गराउन जाने गर्दछन् ।
पछिल्लो समय गोपनियता भङ्ग हुने डरले जुनसुकै आफूलई पायक पर्ने मेडिकलबाट औषधि मार्फत गर्भपतन गर्ने गरेको र यसले महिलाहरुको स्वास्थ्यमा उच्च जोखिम बढेको समेत देखिन्छ ।

स्त्री तथा प्रसुति रोग विशेषज्ञ डाक्टर विदुर भण्डारीका अनुसार गर्भ रहे नरहेको आफैँ जाँच गरी औषधि सेवन गर्दा अपूर्ण गर्भपतन गर्दा समस्या हुने गर्छ । भिडियो एक्सरे नगरी गर्भपतन गराउँदा बच्चा ठूलो भएको अवस्थामा पाठेघर नै फुट्ने समेत उच्च जोखिम रहन्छ । नियम विपरित निजी मेडिकलबाट समेत औषधि किन्ने, औषधि खाएर गर्भपतन गर्ने र औषधि असरले उच्च रक्तस्राव हुँदै पछि गएर जटिल समस्या लिएर अस्पतालमा आउने गरेको उनको भनाइ छ ।

अन्य ठाउँमा असुरक्षित तरिकाले गर्भपतन गराउदा पाठेघरमा चोट लाग्ने,आन्द्रामा चोट लाग्ने हुनुको साथै महिलाको मृत्यु समेत हुन सक्ने जोखिम रहन्छ । गोपनियताको हिसाबले पनि बढिजसो निजी मेडिकलमै गर्भपतन गराउन जाने गरेको उनले बताए ।

नेपालमा कानुन अनुसार तालिम प्राप्त विशेषज्ञले मात्र गर्भपतन गराउन पाउने नियम भएता पनि पछिल्लो समय असुरक्षित गर्भपतन गराउने र गर्ने गरेको कारण धेरै महिलाहरुमा समस्या देखापर्ने गरेको उनले बताए । गर्भपतन गर्नै पर्ने अवस्थामा गर्भपतनका लागि सरकारी अस्पतालमा निःशुल्क र सुरक्षित गर्भपतन गर्ने हुँदा अस्पतालमै गर्भपतन गराउन डाक्टर भण्डारीले सुझाव समेत दिए ।

सुनौलो भविष्य नेपाल पोलिक्लिनिकका प्रबन्ध निर्देशक विजय श्रेष्ठको अनुसार निजी पोलिक्लिनिकमा गर्भपतन गराउने मध्ये ७० प्रतिशत औषधिबाट गर्भपतन गर्ने गरिएको छ । हेटौंडा अस्पतालकै विशेषज्ञ डाक्टरहरु मार्फत नै गर्भपतन गराउने गरेको उनले बताए । सरकारी अस्पतालमाको भन्दा सेवा सुविधा छिटोछरितो पाउनुको साथै गोपनियताको लागि पनि बढीजसो निजी पोलिक्लिनिक नै आउने गरेको उनको भनाइ छ । क्लिनिकमा १० हप्ता सम्मको गर्भपतन औषधिबाटै गर्ने गरेको श्रेष्ठले बताए ।

नेपालमा सम्बन्धित महिलाको मञ्जुरीबिना वा अन्य कुनै कारणबाट गर्भ रहन गएमा १२ हप्तासम्मको गर्भ स्वेच्छिक गर्भपतन गराउन सक्ने अधिकार कानुनमा उल्लेख गरिएको छ ।

• #गर्भपतन
• #मकवानपुर