थानकोट-चित्लाङ सडक असार २० गतेसम्म बन्द हुने
![thankot-chitlang-sadak](https://www.tatokhabar.com/wp-content/uploads/2024/06/thankot-chitlang-sadak.jpg)
काठमाडौं / गणेशमान मार्ग नामले चिनिने थानकोट-चित्लाङ सडकखण्ड आज बिहीबारदेखि आगामी असार २० गतेसम्म बन्द हुने भएको छ ।
सडक निर्माण कम्पनीले सडकको ‘ग्रेड’ उच्च रहेको र चौडाइ कम भएका स्थानमा ‘ब्रेकर’ प्रयोग गरी ‘ब्याक कटिङ’ र ‘ग्रेड डाउन’ गर्न लागिएको जनाउँदै ती दिन बिहान ९ बजेदेखि अपरान्ह ४ बजेसम्म सो सडकखण्ड बन्द हुने चन्द्रागिरि नगरपालिकाले जनाएको छ ।
नगरपालिकाका प्रमुख प्रशासकीय अधिकृत हेमराज अर्यालद्वारा जारी सूचनामा सडक निर्माणको ठेक्का प्राप्त कम्पनीको आग्रहमा सडक बन्द गरेर सडक विस्तार एवं स्तरोन्नति गर्न लागिएको हो ।
चन्द्रागिरि नगरप्रमुख घनश्याम गिरीको विशेष आग्रहमा अर्थ मन्त्रालयले गत माघ १२ गते गणेशमान मार्गलाई तत्काल स्तरोन्नति गर्न रु. आठ करोड विनियोजन गरेको थियो । सो मार्गअन्तर्गत सेतो पहरो क्षेत्र उच्च दुर्घटनाग्रस्त रहेको छ ।
गत पुस २८ गते सेतो पहरो क्षेत्रमा कार दुर्घटना हुँदा पाँच जनाको अकालमा मृत्यु भएको थियो ।
![](https://www.tatokhabar.com/wp-content/uploads/2023/10/daju-bhai-ad-1.gif)