तातोखबर, काठमाडौँ / बंगलादेश सरकारले उपलब्ध गराउने चिकित्सा शिक्षा, स्नातक तहको एमबीबीएस र बीडीएसको तर्फको छात्रवृत्ति कोटामा भएको नाम हेरफेर समस्या समाधान भएको छ ।

बंगलादेश सरकारले नेपालमा चिकित्सा शिक्षा आयोगले लिएको प्रवेश परीक्षा उत्तीर्ण भएका र मेरिटको आधारमा सिफारिस भएका विद्यार्थीलाई नै छात्रवृत्ति कोटामा पढाउने पत्र नेपाल सरकारलाई पठाएसँगै उक्त समस्या समाधान भएको हो ।

Advertisement:

बंगलादेश सरकारले दिने कोटामा चिकित्सा शिक्षा पढ्न बंगलादेश जान नेपाल सरकारबाट १९ जना एमबीबीएस र ३ जना बीडीएस गरी २२ जनाको नाम चिकित्सा शिक्षा आयोगको सिफारिसमा शिक्षा मन्त्रालयले परराष्ट्र मन्त्रालयमार्फत बंगलादेश पठाएको थियो । अन्तिम सूचीमा भने १२ जनाको मात्रै नाम पर्न सफल भएको थियो । यसरी सिफारिस भएका विद्यार्थीको सूची हेरफेर भएर आएकोबारे शिक्षा विज्ञान तथा प्रविधिमन्त्री सुमना श्रेष्ठले नेपालस्थित बंगलादेशी राजदूतसँग छलफल गरेकी थिइन् ।

परराष्ट्र मन्त्रालयले बंगलादेश सरकारलाई कूटनीतिक नोट पठाएकोमा त्यसको जवाफमा बंगलादेशले छुटेका ८ जनालाई समेत समावेश गर्ने निर्णय भएको पत्र कूटनीतिक नोटमार्फत नै चिकित्सा शिक्षा आयोगले सिफारिस गरेका विद्यार्थीलाई नै आफूहरूले पढाउने बंगलादेश सरकारले जनाएसँगै यो समस्या समाधान भएको छ ।

• #एमबीबीएस
• #चिकित्सा शिक्षा
• #चिकित्सा शिक्षा आयोग
• #छात्रवृत्ति
• #बंगलादेश सरकार
• #बीडीएस
• #स्नातक तह