तातोखबर, काठमाडौँ / दाइजोमा सुनको सिक्री नपाउँदा विवाह मण्डपमै विवाह अस्वीकार गरेको आरोपमा बेहुलासहित आठजनालाई प्रहरीले पक्राउ गरेको छ ।

बेहुला बारा कलैया उपमहानगरपालिका–४ सिनेमा चोक बस्ने उमेश साह हुन् । उनि सहित आठजनालाई प्रहरीले पक्राउ गरेको हो । वीरगन्ज महानगरपालिकाको स्वास्थ्य शाखामा कार्यरत कम्प्युटर अपरेटर साहले दाइजोमा सुनको सिक्री नपाएपछि विवाह नै रद्द गरेका थिए।

Advertisement:

पर्साको वीरगञ्ज महानगरपालिका–२४ रानीघाटका सुखल साहकी अन्दाजी २४ वर्षीय छोरी रमिता कुमारीको सोमबार राति बिहे तय भएको थियो । साहले दाइजोमा नगद १२ लाख, मोटरसाइकल बापत ३ लाख २५ हजार, एक थान ल्यापटप र एक–एक थान सुनको अ‍ौ‌ठी र हनुमानको माला पाइसकेपछि पनि गए राति मण्डपमा सुनको सिक्री नपाएपछि बिहे नै रोकिदिएर जन्ती फिर्ता लगेका हुन् । बेहुलाले जन्ती फर्काउन खोज्दा प्रहरी पुगेर बेहुलासहित ८ जनालाई पक्राउ गरेको प्रहरीले जनाएको छ ।

विवाद भएपछि गएर बेहुला पक्षका ८ जनालाई पक्राउ गरेको वडा प्रहरी कार्यालय श्रीपुरका प्रहरी निरीक्षक धर्मजंग थिङ्ले जानकारी दिएका छन् । जन्तीलाई स्वागत गर्न पन्डालदेखि राम्रो खाना नास्ताको पनि व्यवस्था गरेको भए पनि लगभग ५० हजारको सिक्री नपाउँदा बेहुलाले मण्डपबाट भाग्न खोज्दा विवाद उत्पन्न भएको थियो ।

पक्राउ परेकाहरुलाई श्रीपुर वडा कार्यालयमा राखिएको छ। मधेस प्रदेशमा बालविवाह र दाइजो प्रथाको बिगबिगी बढेको छ। दाइजोका कारण विवाह रोकिएको यो एउटा उदाहरण मात्र हो। दाइजो नदिएकै कारण विवाह रोकिने र विवाह भइसकेपछि पनि हत्या गरिने जस्तो जघन्य अपराध मधेस प्रदेशमा निरन्तर हुँदै आएका छन्।

• ## प्रहरी
• #दाइजो
• #पक्राउ
• #विवाह
• #सुनको सिक्री