तातोखबर, काभ्रेपलाञ्चोक / धुलिखेलस्थित काठमाडौँ विश्वविद्यालय (केयू)ले बिहीबारदेखि ‘अन्तर्राष्ट्रिय उपकुलपति सम्मेलन’ आयोजना गर्ने भएको छ।

भारतीय विश्वविद्यालय संघको आयोजना एवं काठमाडौँ विश्वविद्यालयको व्यवस्थापनमा आयोजित सम्मेलनमा नेपाल, भारत, बङ्गलादेश, मलेसिया, थाइल्याण्डलगायत १५० देशका विश्वविद्यालयका उपकुलपति तथा शिक्षाविद्को उपस्थिति रहने छ।

Advertisement:

नेपालको उच्च शिक्षालाई अन्तर्राष्ट्रियकरण गर्ने तथा अन्तर्राष्ट्रियस्तरमा विश्वविद्यालयको सम्बन्ध स्थापित गर्ने उद्देश्यले अन्तर्राष्ट्रिय उपकुलपति सम्मेलन आयोजना गरेको केयूका उपकुलपति प्राडा भोला थापाले जानकारी दिए।

उनका अनुसार सम्मेलनमा विश्वले उच्च शिक्षाको क्षेत्रमा भोगिरहेको समकालीन मुद्दा, उच्च शिक्षाको अन्तर्राष्ट्रियकरण, अन्तर–विश्वविद्यालय सहकार्य, वैश्विक उच्च शिक्षा नीति आदि विषयमा छलफल हुने उपकुलपति प्राडा थापाले बताए।

सम्मेलनमा २२७ सहभागीले सहभागिता जनाउने निश्चित गरेको विश्वविद्यालयले जनाएको छ। सम्मेलनमा अधिकांश सहभागी भारतीय विश्वविद्यालयबाट हुनेछन् भने दक्षिण पूर्वी एसियाली क्षेत्र, युरोप र अफ्रिकाका विश्वविद्यालयका प्रतिनिधिसमेत सहभागी हुनेछन्।

सम्मेलन शनिबारसम्म चल्नेछ।

• #अन्तर्राष्ट्रिय उपकुलपति सम्मेलन
• #काठमाडौँ विश्वविद्यालय
• #केयू