स्ववियु निर्वाचनको मतदान केन्द्र यी सामान लैजान निषेध

त्रिभुवन विश्वविद्यालयले स्ववियु निर्वाचनको मतदान केन्द्रमा मोबाइलदेखि पानीका बोतल लैजान निषेध गरेको छ । निर्वाचनलाई भयरहित बनाउनका लागि त्रिविले मोबाइल, पानीका बोतल, जार तथा घरेलु हातहतियार मतदान केन्द्रमा लैजान प्रतिबन्ध लगाएको हो ।

Advertisement:

स्ववियु निर्वाचन केन्द्रीय अनुगमन तथा समन्वय समितिका सदस्यसचिव पशुपति अधिकारीले निर्वाचनलाई भयरहित बनाउनका लागि तरल, धातुजन्य वस्तु, डिजिटल वस्तु र आगोजन्य वस्तु मतदान केन्द्रमा लैजान निषेध गरिएको बताए ।

उनका अनुसार पानीका बोतल, पेट्रोल, डिजल, मादक पदार्थ, औषधिजन्य वस्तु, सिसाका बोतल, रङ, मसी लैजान निषेध गरिएको छ ।

यस्तै धातुजन्य वस्तुमा नङकट, धारिलो हतियार, भाला, खुकुरी, छुरी, चक्कु, डिजिटल वस्तुमा मोबाइल, क्यामेरा, झोला, लौरो, हेल्मेट, छाता, चाबी, रेकर्डर, साइकल तथा मोटरसाइकलको चेनसमेत लैजान प्रतिबन्ध गरिएको छ । यस्तै लाइटर, सलाई, ग्यासजन्य वस्तु पनि लैजान प्रतिबन्ध गरिएको छ ।

उनले त्रिविअन्तर्गतका सबै क्याम्पसमा रहेका निर्वाचन समितिलाई प्रतिबन्धित वस्तु लैजान निषेध गर्न निर्देशनसमेत दिइसकेको जानकारी दिए ।

अध्यक्ष, सचिव र कोषाध्यक्ष तथा ५० प्रतिशत सदस्य प्रत्यक्ष निर्वाचन प्रणाली र उपाध्यक्ष, सहसचिव र ५० प्रतिशत सदस्य समानुपातिक निर्वाचन प्रणालीबाट निर्वाचित हुनेछन् । स्ववियु निर्वाचनका लागि ६२ आङ्गिक र एक हजार ४० क्याम्पसमा एकै साथ यही चैत ५ गते बिहान ८ बजेदेखि दिउँसो ४ बजेसम्म मतदान हुने छ ।

त्रिचन्द्र क्याम्पसमा स्ववियु चुनाव ९ चैतमा हुने

काठमाडौंको घण्टाघरस्थित त्रिचन्द्र क्याम्पसमा चैत ९ गते स्वतन्त्र बिद्यार्थी युनियन (स्ववियु) चुनाव हुने भएको छ ।
बिद्यार्थी भर्नालाई लिएर भएको विवादका कारण निर्वाचन तालिका प्रभावित भएको थियो । निर्वाचन अधिकृत राजेन्द्र गौतमले नयाँ चैत ९ गते चुनाव गर्ने गरी नयाँ कार्यतालिका सार्वजनिक गरेका छन् ।
जहाँ मतदाता नामावली चैत ३ गते प्रकाशन गर्ने उल्लेख छ । त्यसउपर दावी विरोधका लागि चैत ४ गतेको समय दिइएको छ । ५ गते उम्मेदवारी दर्ता र ६ गते उम्मेदवारहरुउपर दावी विरोधका लागि समय दिइएको छ । ७ गते प्रचारप्रसारका लागि समय दिने तय भएको छ ।

७ गतेदेखि नै मौन अवधि सुरु हुनेछ । ९ गते बिहान ८ बजेदेखि दिउँसो ४ बजेसम्म मतदानको समय तय गरिएको छ ।
मतदाता विद्यार्थीको नाममा विवाद भएका कारण त्रिविले तोकेको ५ चैतमा चुनाव हुन नसकेको हो ।

भर्ना नभएका र पुराना विद्यार्थीलाई समेत मतदाता नामावलीमा समावेश गरिएको भन्दै एमालेको विद्यार्थी संगठन अनेरास्ववियु र माओवादी केन्द्रको अखिल क्रान्तिकारीले विरोध गरेका थिए ।
तर स्ववियु निर्वाचन प्रक्रिया अघि नबढाइएको भन्दै कांग्रेसको विद्यार्थी संगठन नेविसंघले क्याम्पस प्रमुख, सहायक क्याम्पस प्रमुख र निर्वाचन अधिकृतको कार्यकक्षका कुर्सी-टेबल तोडफोड गरेको थियो ।

विद्यार्थीहरूले क्याम्पस प्रमुख प्रा.डा. सुनिल अधिकारीको कुर्सी र नेम प्लेट नै गेटमा राखेर प्रदर्शन गरे । जहाँ ‘क्याम्पस प्रमुख हराएको सूचना, निर्वाचन अधिकृत खोइ ? लगायतका प्रश्नहरु लेखेर टाँसिएका थिए ।
क्याम्पस प्रशासन र कांग्रेस निकट विद्यार्थी संगठनको मिलेमतोमा फागुन ४ गते फर्जी भर्ना गराइएको आरोप एमाले र माओवादी निकट विद्यार्थी संगठनको छ ।
क्याम्पस प्रशासन स्रोतका अनुसार साढे ८ हजार विद्यार्थी छन् । त्यसमध्ये साढे ७ हजार बढी मतदाता रहने कायम रहनेछन् । यो क्याम्पसमा विगतमा नेविसंघको प्रभाव रहँदै आएको छ । यसपटक पनि नेविसंघको प्रभाव ज्यादा रहेको अन्य संगठनहरु पनि स्वीकार गर्छन् । तर, कांग्रेसमा दुई धार छ । कांग्रेस संस्थापन पक्षबाट बिपिन ढुंगाना आफूलाई सभापतिको दाबेदारको रुपमा प्रस्तुत गर्दै गतिविधि सञ्चालन गरिरहेका छन् । संस्थापन इतर पक्षबाट सुमन बसौला छन् ।
एमालेको अनेरास्ववियुबाट जगतजंग शाही, माओवादी केन्द्रको अखिल क्रान्तिकारीबाट अशोक भण्डारी र नेकपा एकीकृत समाजवादीबाट विकासजंग शाही अध्यक्षका दाबेदार छन् ।
अखिल क्रान्तिकारीका भण्डारीले आफ्नो संगठन हरसम्भव चुनाव गराउन लागिरहे पनि अन्य संगठनले बखेडा झिकेको आरोप लगाउँछन् ।