चामे, ५ मंसिर / प्रतिनिधिसभा तथा प्रदेशसभाको हिजो सम्पन्न मतदानको हिमालपारीको जिल्ला मनाङमा पनि मतगणना शुरु भएको छ । प्रतिनिधि सभाको एक र प्रदेशसभाका २ निर्वाचन क्षेत्र रहेको मनाङमा अहिले मध्यान्हपछि आवश्यक प्रकृया पूरा गरी मतगणना कार्य शुरु गरिएको हो ।
मनाङमा मतगणनाको पछिल्लो अपडेटअनुसार प्रतिनिधि सभाको मतगणनाको नतिजा आउन शुरु भएको तातोखबर डटकमका मनाङसम्वादाताले बताएका छन् । प्राप्त पछिल्लो जानकारी अनुसार प्रतिनिधि सभा सदस्य पदका लागि ९८५ मत गणना हुँदा नेकपा एमालेले ५९४ मत प्राप्त गरेको छ भने नेपाली कांग्रेसले ३८८ मत प्राप्त गरेको र राष्ट्रिय स्वतन्त्र पार्टीले घण्टी चिन्हमा कुनै मत हासिल नगरेको र ३ मत बदर भएको निर्वाचन अधिकृतको को कार्यालयले जनाएको छ ।
त्यस्तै प्रदेश सभाका लागि मनाङ ‘क’ मा प्राप्त पछिल्लो नतिजा अनुसार नेपाली कांग्रेसका मुनिन्द्रजङग् गुरुङले २९४ मत प्राप्त गरेका छन् भने नेकपा एमालेका राजन गुरुङले ४७८ मत र राप्रपाका मिफल ढोंडु लामाले ९ मत मात्र प्राप्त गरेका छन् । अहिलेसम्म ३ मत बदर भएको निर्वाचन अधिकृतको कार्यालयले जानकारी दिएको छ ।
