भैरहवाबाट दिल्ली उडान गर्ने नेपाल एयरलायन्सको तयारी

काठमाडौँ, १ मंसिर/ गौतम बुद्ध अन्तर्राष्ट्रिय विमानस्थल पूर्णरुपमा सञ्चालनमा आउन थालेपछि नेपाल वायुसेवा निगमले भैरहवाबाट दिल्लीसम्मको उडान भर्ने तयारी गरेको छ । निगमले आगामी मंसिर १२ गतेदेखि उडान गर्न लागेको हो ।
पहिलो चरण अन्तर्गत मंसिर १२ एउटा उडान हुने र त्यसपछि मंसिर १५ पछि सातामा दुई दिन बुधबार र शुक्रबार निगमको विमानले भैरहवाबाट पनि उडान गर्ने निगमका कार्यकारी अध्यक्ष युवराज अधिकारीले बताएका छन् ।
निगमको काठमाडौंबाट उडेको विमान दिल्ली पुगेर भैरहवा फर्किने र त्यहाँ यात्रु ओरालेर काठमाडौं फर्किने तालिका रहेको साथै यात्रुको चाप बढ्दै गयो भने निगमले भैरहवाबाट सिधा दिल्ली उडान गर्ने नागरिक उड्डययन प्राधिकरणका सहायक प्रवक्ता ज्ञानेन्द्र भूलले जानकारी दिएका छन् । उनका अनुसार भैरहवाबाट निगमले उडान अनुमति लिएसँगै प्राधिकरणले यसअघि जारी गरेको शितकालीन अन्तर्राष्ट्रिय उडान तालिकामा काठमाडौंबाट कटौती गरिएका निगमका दिल्ली लगायतका क्षेत्रका उडान फुकुवा गरिदिएको छ ।