काठमाडौं, जेठ ३१ । भारतले चिनी निर्यातमा गत जुन १ गते देखि लागु हुनेगरी रोक लगाएको थियो । चिनी निर्यातमा रोक लगाउनेबारे भारतीय सञ्चारमाध्यमले एक-डेढ हप्ता अघिदेखि नै जनाई रहेका थिए ।

भारतले चिनीमा प्रतिबन्ध लगाएपछि नेपाली बजारमा चिनीको मूल्य बढ्ने आशंका धेरैले गरेका हुन् । आशंका अनुसार नै चिनीको मूल्य किलोमा ५ देखि १० रूपैयाँसम्म बढ्यो ।

Advertisement:

अहिले बजारमा चिनीको मूल्य प्रतिकिलो एक सय पाँच रूपैयाँ पुगेको नेपाल खुद्रा व्यापार संघले जनाएको छ ।
यसअघि उपभोक्ताले चिनी प्रतिकिलो ९५ देखि १०० रूपैयाँसम्म तिर्दै आएका थिए ।

संघले जेठ १५ गते पठाएको तथ्यांकअनुसार चिनी प्रतिकिलो एक सय रूपैयाँ थियो ।

पछिल्लो समय चिनीको होलसेल मूल्य बढेर आएकाले आफूहरू पनि चिनीको मूल्य बढाउन बाध्य भएको संघले जनाएको छ ।

संघका अनुसार भारत सरकारले चिनी निर्यातमा प्रतिबन्ध लगाएदेखि नै चिनीको मूल्य प्रतिकिलो दुईदेखि तीन रूपैयाँ गरेर उद्योगीले बढाएका छन् ।

केहि दिन अघि उद्योगीबाट चिनी किनिएको र उक्त मूल्यका आधारमा प्रतिकिलो एक सय पाँच रूपैयाँ पुगेको श्रोतले जनाएको छ । फेरि नयाँ चिनी ल्याउँदा उपभोक्ता मूल्य अझै बढ्न सक्ने अनुमान गरिएको छ ।