काठमाडौं । नेपाली सेनाले विश्वको सर्वोच्च शिखर सगरमाथा, ल्होत्से, कञ्चनजङ्घा तथा मनास्लु हिमालबाट तीस टनभन्दा बढी फोहर सङ्कलन गरेको छ । आठ हजारभन्दा माथिका उच्च हिमाली क्षेत्रमा थुप्रिएको फोहर हटाई पर्यावरण संरक्षण तथा पर्यटन पर्वद्धन गर्ने उद्देश्यले नेपाली सेनाले प्रत्येक वर्ष हिमाल सफा अभियान सञ्चालन गर्दै आएको छ ।
भावी पुस्ताका लागि हिमाल संरक्षण गर्न ‘हाम्रो हिमाल हाम्रो दायित्व’ भन्ने नारासहित सुरु भएको हिमाल सफा अभियान-२०२२ अन्तर्गत गत चैत २२ गते सुरु भएको थियो । नेपाली सेनाको सैनिक जनसम्पर्क तथा सूचना निर्देशनालयका अनुसार हालसम्म सगरमाथा, ल्होत्से, कञ्चनजङ्घा मनास्लु गरी चारवटा हिमालबाट ३० हजार ३४४ केजी फोहर सङ्कलन भइसकेको छ ।
जस अनुसार सर्वोच्च शिखर सगरमाथा र ल्होत्सेबाट कुहिने एक हजार ३०८ के.जी र नकुहिने ८ हजार ६२४ के.जी गरी जम्मा नौ हजार ९३२ केजी फोहर सङ्कलन भइसकेको छ । यसैगरी कञ्चनजङ्घाबाट कुहिने तीन हजार १७ के.जी तथा नकुहिने १२ हजार ३५६ के.जी गरी जम्मा १५ हजार ३७३ केजी फोहर सङ्कलन भइसकेको छ ।
मनास्लु हिमालबाट ९४१ के.जी कुहिने र चार हजार ९८ के।जी नकुहिने गरी जम्मा पाँच हजार ३९ के.जी फोहर जम्मा गरिएको छ । नेपाली सेनाका अनुसार चारवटा हिमाबाट कुहिने फोहर पाँच हजार २६६ के.जी र नकुहिने फोहर २५ हजार ७८ के.जी गरी जम्मा ३० हजार ३४४ के.जी फोहर सङ्कलन गरिएको छ ।
आगामी जेठ २२ गतेसम्म सञ्चालन हुने हिमाल सफा अभियानमार्फत नेपाली सेनाले चारवटा हिमालबाट ३५ टन फोहर सङ्कलन गर्ने लक्ष्य लिएको छ । सगरमाथा र ल्होत्से हिमालमा १२ जना तथा कञ्चनजङ्घा र मनस्लु हिमालमा नौ-नौ जना गरी ३० जना नेपाली सेना सफाइ अभियानमा खटिएका छन् ।
