काठमाण्डौं साउन-१
धनगढी उपमहानगरपालिका–१९ फुलबारीमा आज विशेषज्ञ वडा क्लिनिक सेवाको शुभारम्भ गरिएको छ । उपमहानगरपालिकाका आम जनताले स्वास्थ्य सेवाबाट वञ्चित हुन नपरोस् र सबैलाई सर्वसुलभ स्वास्थ्य सेवा प्राप्त होस् भन्ने उद्देश्यले वडामा विशेषज्ञ चिकित्सकसहितको वडा क्लिनिक सेवाको शुभारम्भ गरिएको हो ।
उक्त विशेषज्ञ वडा क्लिनिक सेवाको उद्घाटन सुदूरपश्चिम प्रदेशका मुख्यमन्त्री त्रिलोचन भट्टले एक कार्यक्रमका बीच गर्नुभयो । उद्घाटन समारोहमा उहाँले जसरी धनगढी उपमहानगरपालिकाले साझेदारी कार्यक्रमका रूपमा यो अभियानको थालनी गरेको त्यसैगरी अन्य स्थानीय तहले यस्ता किसिमका कार्यक्रम गरे पालिकालाई सहयोग गर्न प्रदेश सरकार तयार रहेको बताउनुभयो । उहाँले प्रदेशका सबै जिल्लामा एम्बुलेन्सको व्यवस्था विगतमा गरेको र अब जिल्लामा मात्रै नभएर स्थानीय तहमा पनि एकीकृत एम्बुलेन्स सेवा सञ्चालन गर्ने प्रदेश सरकारको नीति रहेको जानकारी दिनुभयो । क्लिनिकबाट प्रत्येक महिना तालिकाअनुसार धनगढी उपमहानगरपालिकाका–१९ वटै वडामा निःशुल्क स्वास्थ्य सेवा प्रदान गर्ने व्यवस्था मिलाइएको नगरप्रमुख गोपाल हमालले जानकारी दिनुभयो ।
विशेषज्ञ वडा क्लिनिक सेवा सञ्चालनका लागि धनगढीको भाटभटेनी सुपरमार्केटका प्रबन्ध निर्देशक मीनबहादुर गुरुङसँग दुई चिकित्सकको पाँच वर्षसम्म तलब भत्ता दिने सम्झौता उपमहानगरपालिकासँग भएको प्रमुख हमालले बताउनुभयो । त्यस्तै वडा क्लिनिक सञ्चालन गर्न सुदूरपश्चिम प्रदेशको सामाजिक विकास मन्त्रालयले रु २५ लाख ५० हजार बराबरको स्वास्थ्य उपकरण सहयोग गरेको छ भने र उपमहानगरपालिका क्षेत्रका औषधि व्यवसायीबाट औषधि उपलब्ध भएको बताइएको छ ।
नगरप्रमुख हमालले यसअघि नै आफूलाई चढ्न दिइएको गाडी उक्त सेवा सञ्चालनका लागि स्वास्थ्य शाखालाई प्रदान गर्नुभएको थियो । उद्घाटन समारोमा प्रदेशसभा सदस्य नेपालु चौधरी, नगर उपप्रमुख कन्दकला राना, सहायक प्रमुख जिल्ला अधिकारी, सुरक्षा निकायका प्रतिनिधि, स्वास्थ्य सेवा क्षेत्रका प्रतिनिधि, समाजका प्रतिष्ठित सामाजिक व्यक्तित्व, पत्रकार, स्थानीयवासीलगायतको उपस्थिति थियो ।
-रासस
