तातोखबर सम्वाददाता
काठमाडौं, जेष्ठ १५/ सरकारले आगामी आर्थिक वर्षको २०७९÷०८० को लागि आफ्नो अनुमानित बजेट सार्वजनिक गरेको छ । नेपाल सरकारका अर्थमन्त्री जनार्दन शर्माले व्यवस्थापिका आईतवार संसदमा आगामी आर्थिक वर्षको बजेट सार्वजनिक गरेका हुन् ।
आर्थिक वर्ष २०७९÷०८० का लागि सरकारले १७ खर्ब ९३ अर्ब ८३ करोड रुपैयाँ बराबरको बजेट घोषणा गर्दै उपलब्ध प्राकृतिक श्रोत साधन, श्रम शक्ति, पुँजी र प्रविधिको एकीकृत परिचालनबाट रोजगारी सिर्जना र गरिबी निवारण गर्ने लक्ष्य लिएको उल्लेख गरेको छ । कुल विनियोजिनमध्ये चालुतर्फ ७ खर्ब ५३ अर्ब ४० करोड विनियोजन गरेको छ भने पुजीगत तर्फ ३ खर्ब ८० अर्ब ३८ करोड रुपैयाँ बजेट विनियोजन गरेको छ ।
त्यसैगरी सरकारले प्रस्तुत गरेको बजेटमा वित्तीय व्यवस्थापनतर्फ २ खर्ब ३० अर्ब २२ करोड रुपैया र प्रदेश तथा स्थानीय तहमा हस्तान्तरण तर्फ ४ खर्ब २९ अर्ब ८३ करोड रुपैयाँ बजेट विनियोजन गरेको छ । अर्थमन्त्री शर्माले आर्थिक वर्ष २०७९÷०८० को वार्षिक आय ब्ययको अनुमानित बजेट प्रस्तुत गर्दै आन्तरिक राजस्वबाट १२ खर्ब ४० अर्ब, वैदेशिक अनुदानबाट ५५ अर्ब ११ करोड खर्चको श्रोत व्यहोर्नुका साथै वैदेशिक ऋणबाट २ खर्ब ४२ अर्ब २६ करोड र २ खर्ब ५६ अर्ब आन्तरिक ऋण गरी कुल ४ खर्ब ९८ अर्ब ४६ करोड रुपैया बराबर ऋण लिईने बताएका छन् ।
बजेटमा नेपालको कृषि क्षेत्रको रुपान्तरण गरी उत्पादन बृद्धि र रोजगारी सिर्जना गर्न, निर्यात प्रबद्र्धन र आयात प्रतिस्थापन गर्न, अर्थतन्त्रर्लाइ आत्मनिर्भर बनाउनुका साथै निरपेक्ष गरिबी निवारण बजेटको मूख्य प्रथामिकतामा परेको प्रस्तुत बजेट मा उल्लेख गरिएको छ । सरकारले नेपाली वस्तु विदेश निर्यात गर्दा ८ प्रतिशत नगद अनुदान दिने नीति लिएको छ । यससँगै सरकारले आगामी आर्थिक वर्षमा झण्डै ८ प्रतिशत आर्थिक वृद्धिदर कायम गर्ने लक्ष्य राखिएको पनि अर्थमन्त्री जनार्दन शर्माले बताएका छन् ।
त्यसैगरी देशमा कृषिलाई उद्योगकै रुपमा विकास गर्न कृषि औजार कारखानालाई चाहिने उपकरण आयातमा ५ वर्षसम्म आयकर छुट गर्नेघोषणा पनि गरेको छ भने स्थानीय पूर्वाधार आयोग पनि खारेज गर्ने र नगर विकास कोषलाई शहरी विकास कम्पनीमा पुनसंरचना गर्ने भएको छ ।
अर्थमन्त्रीद्वारा प्रस्तुत आगामी वर्षको बजेटमा चुरे संरक्षणका लागि २ अर्ब १७ करोड बजेट विनियोजन गरेको छ भने निजी जमीनमा लगाईएका रुखहरुलाई पनि कृषि बालीका रुपमा बिक्री गर्न पाईने बताईएको छ ।
अर्थमन्त्रीले आगामी वर्षको बजेट सार्वजनिक गरेपछि बजेटका विषयमा विभिन्न प्रतिकृया आउन थालेका छन् । व्यावसायिक संगठनका अधिकारीहरुले यस वर्षको बजेट हुबहु कार्यान्वय हुने हो भने यो सुखद भएको बताएका छन् ।

Advertisement: